tommi.is

Ég var plataður í vinnunni til að dúsa niður í Laugardalshöll til átta í kvöld, það er einhver iðnaðarmanna sýning og EJS mun prómóta ofur vélina sína þarna. Allir arkitektar og athafnamenn landsins eiga eftir að kolfalla fyrir þessari ofurgræju. Dell Precision hell je. Það er alveg málið þegar menn eru að brasa við einhvern ofurskít sem venjulega vélin þín ræður ekki við. Precision er málið.

Annars þá rústaði ég gjörsamlega aleinn og óstuddur svefnvenjum barnsins í gær. Málið var að Rúna fór í Trimform þegar hún var búin að sækja mig í vinnuna og þá fær Kristján yfirleitt að leggja sig í svona 10 mín í bílnum. En þar sem að Rúna var búin að setja mér fyrir verkefni á meðan hún var í trimforminu að þá svaf Kristján litli bara allan tímann á meðan ég þeysti bæjarhorna á milli með fisk og annað góðmeti handa hinum og þessum. Litli kúturinn byrjaði að rumska rétt áður en ég sótti Rúnu… semsagt, guttinn svaf í 60 mín í staðin fyrir 10 mín… og viti menn, hann var vakandi kl 23:30 þegar ég kom heim eftir að hafa verið með Magga að setja límmiða á hjólið mitt. En í fullu fjöri og voða stuð. Hann er nefninlega vanur að sofna á milli 20:30 og 21:00

En hann sofnaði nú að lokum og var svo ræstur kl 9 í morgun. Þetta ætti að reddast og vonandi að hann taki nú ekki upp á því að vera vakandi fram að miðnætti á hverju kvöldi.

Þangað til næst…..

Já, ég fór á árshátíð EJS um helgina. Klæddi mig í mitt fínasta púss og hélt ótrauður af stað aleinn, konan lá í flensu heima en ég ákvað að skella mér fyrst að þetta var fríkeypis í boði starfsmannafélagsins.

Þetta var jú ágætt, tillti mér á borð með Ragga og Fríðu og beið glorhungraður eftir matnum. Fljótlega bar þar að ofurölvi manneskju sem hafði líklega fengið sér aðeins og mikið neðan í því. Ofurölvi manneskjan ákvað að tilla sér við hliðina á mér, jú jú það var svo sem í lagi ef hún yrði ekki með læti. Mér varð ekki að ósk minni, fljótlega fóru að berast hin ýmsu tilboð frá ofurölvi manneskjunni um að fara upp á svið að syngja eða að dansa upp á borði osfr, mér til lítillar skemmtunar. Fljótlega uppúr þessu var komið með forréttinn. Ofurölvi manneskjan þurfti mikið að tjá sig um ágæti þessa forrétts og ég held að enginn á borðinu hafi komist þar undan… “Hva ætlaru ekki að borða skelfiskinn þinn???” “Humarinn er æði” og fleiri fleygar setningar fengu að fljóta.
Þá tók við mikil bið eftir aðalréttnum. Þegar hann kom loks á borðið var þegar búið að skenkja ofurölvi manneskjunni 3 sinnum of oft í glasið.
Yfir aðalréttnum héldu fleygu setningarnar áfram að fljúga… “Af hverju er kartaflan ferköntuð??”, “Viltu borða kjötið mitt???” osfr.

Þarna var aðeins farið að fjúka í kallinn enda kominn með hausverk af öllum þessum asnalegu spurningum, það fór nú þannig að maður lét sig bara hverfa áður en eftirrétturinn kom á borðið. Frekar lúmskur á því.

Kíkti svo í afmælið hans Batta eftir þetta og kastaði kveðju á liðið. Fór svo heim í háttinn.

Þangað til næst….

Til hamingju með afmælið í dag mússímússíkrússídúllurnar mínar…

INTER 98 ára í dag

Þangað til næst…..

Ég er þræl pirraður að enginn skildi vilja klukka mig. Allir sem voru eitthvað smá líklegir til þess segjast bara ekki vilja klukka einn né neinn… hnuss, þannig að ég ætla bara að gera þetta sjálfur og svo ekki klukka neinn og hana nú.

Fjögur störf sem ég hef unnið um ævina:

.Frystitækjafræðingur í frystihúsi Grundarfjarðar
.Starfsmaður í húsgagnadeild Rúmfatalagersins
.Háseti á netakoppnum Grundfirðing SH
.Sölufulltrúi í EJS

Fjórar bíómyndir sem ég gæti horft á aftur og aftur:

.Star Wars (allar)
.Highlander
.The Rock
.Ace Ventura pet detective

Fjórir staðir sem ég hef búið á:

.Grundarfjörður
.Söðulsholt Eyjahreppi
.Akureyri
.Reykjavík city of death

Fjórir sjónvarpsþættir sem ég hef dálæti á:

.24
.Prison Break
.Lost
.Fóstbræður

Fjórir staðir sem ég hef heimsótt í fríum:

.Mallorca
.Krít
.London
.Manchester (Old Trafford)

Fjórar (ekki blogg) síður sem ég skoða daglega

.www.fotbolti.net
.www.manutd.is
.www.skysports.com/football
.www.mbl.is

Fernt matarkyns sem mér finnst gott að borða:

.Kjúllinn hennar Rúnu/Ellenar
.Grillað lambakjöt
.Nonnabiti (lambabátur)
.Nr 10 á KFC

Fjórar bækur sem ég les oft:

.Lord of the rings
.Svalur í New York
.Býr Íslendingur hér (Leifur Möller)
.Saga Rauðu djöflanna (saga Man Utd)

Fjórir staðir sem ég vildi vera á núna:

.Grundarfirði
.Old Trafford
.Heitri sólarströnd
.Heima hjá Rúnu og Kristjáni Frey

Fjórir bloggarar:

.geta étið það sem úti frýs

Þangað til næst…..

Þar sem að það virðist vera í tísku að skrifa svona opin bréf á blogginu sínu og rífast við mann og annan að þá verð ég bara að koma með eitt hérna.

Opið bréf til Jóns Frímanns Eiríkssonar.

Kæri herra Jón Frímann

Ég vildi bara benda þér kurteisislega á það að það nennir enginn að lesa blogg um toghlera og botnvörpur til lengdar. Ég held að með tækni google að þá geti hver sá sem hefur áhuga á að fræðast um þessa hluti orðið sér úti um þessar upplýsingar með lítilli fyrirhöfn.
Þér fyrirgefst nú fyrir svona lagað því að ég veit fyrir víst að þú uppgvötvaðir Google fyrir innan við ári síðan.
Ég held að þú ættir að toga þinn þrjóska haus út úr rassgatinu á þér og fara að skrifa eitthvað skemmtilegt… eins og til dæmis að svara þessu bréfi hérna sem undirritaður er að hripa niður og glottir við tönn.
Svo vil ég líka benda þér á að þínar skoðanir eru ekki algildar þó að vissulega eigirðu rétt á að tjá þig eins og hver annar. Skagamenn eru ekki endilega bestir þó svo að þeir hafi unnið einhverja silfurkoppa árið sautjánhundruð og súrkál. Liverpool eru heldur ekki bestir og í guðanna bænum ekki reyna aftur að troðast með eitthvað LFC dót inná mitt heimili þar sem að aðeins eitt fótboltalið frá Englandi er stutt (sjá meðfylgjandi mynd)

Með þessu áframhaldi og þröngsýni þá stefnirðu í að setja íslandsmet í leiðindum þegar þú verður sestur í helgan stein. Ég sé þig fyrir mér sitjandi í ruggustól, japlandi tannlaus á stappaðri kartöflu lemjandi hjúkkur með stafnum þínum fyrir slælega þjónustu og tuðandi um að svona hafi þetta nú ekki verið í þínu ungdæmi.

En batnandi mönnum er best að lifa og ég vona svo innilega að þú hafir það sem allra allra best í framtíðinni því traustari vin er vart að finna fyrir utan ofangreinda galla.

Kveðja, þinn vinur Tómas Freyr Kristjánsson

Þangað til næst…

Nú er Öskudagur að kveldi kominn. Líklega er öskrandi krakki hoppandi í rúminu sínu ennþá klætt sem Sylvía Nótt, Batman eða Hippi og í ofur sykursjokki eftir sníkjur dagsins, í öðru hverju húsi. Þetta er einn af verstu dögunum til að vera að vinna í verslun. Fullt af mismunandi dúllulegum krökkum að sníkja sælgæti fyrir að syngja lítinn lagstúf. Allt frá litlum feimnum mjög svo sætum krílum sem koma með mömmu sinni alveg uppí bólugrafna unglinga sem eru helst til of gamlir fyrir svona lagað en eru drifnir áfram af nammigræðgi til að standa skömmustulegir fyrir framan mann og syngja eitthvað ömurlega ófrumlegt lag.

Í dag sá ég 48 útgáfur af Sylvíu Nótt og heyrði “Til hamingju Ísland” 14 sinnum, misvel sungið. Ég vitna enn og aftur í greinina af Baggalút sem má finna hér fyrir neðan.

Sem betur fer er heilt ár þangað til að þessi dagur rennur upp aftur.

Svo var ég að henda inn nýjum myndum inn á síðuna, þar er meðal annars að finna myndir af nýja hjólinu hans Vigga sem er helvíti glæsilegt á að líta.

Batman út….

þangað til næst…..

Þar sem að ég sit hérna í vinnunni og hef ekkert að gera fór ég allt í einu að hugsa um offitu öryrkjan sem var í hungurverkfalli fyrir jól en grenntist ekki neitt… Hvað ætli hafi orðið um hana? Allt í einu fór voðalega lítið fyrir þessu. Ætli hún sé dauð??? Efast um það þar sem að hún leit alveg eins út eftir 68 daga hungurverkfall eins og hún gerði áður en hún hætti að næra sig. Líklega hefur hún verið duglega við að læðast í ískápinn þegar enginn sá til hmmmm. Meiri vitleysan. Spurning um að hringja í DV og heimta 5000 kall fyrir skúbbið hehehehe.

Hérna er svo mynd af Sonju eftir 94 daga hungurverkfall

Þangað til næst…..

Ég gerði svolítið ljótt af mér…..

Ég er með bullandi samviskubit yfir þessu….

Veit ekki hvað ég á að gera….

Mér líður illa þegar ég horfi á barnið mitt…

Nú eru eflaust margir farnir að spuglera hvað í andskotanum ég gerði af mér?
Jú málið er að ég tók litla sæta barnið mitt og rakaði allt hárið af honum 😦
Nú lítur hann út eins og gyðingur í fangabúðum. Aumingja litli kallinn minn. En þetta venst. Ég set inn myndir af þessu í kvöld.

Fyrir og eftir

Þangað til næst….

Já ég er ánægður með framlag Íslands í Auravisjón. Þessi keppni er hvort eð er algjört krapp og kominn tími til að hrista aðeins upp í þessu.

Vatnsberarnir voru að keppa á Ragnarsmótinu í Reykjaneshöllinni í dag, gerðu fína för og komu heim með brons pening. Fyrstu medalíurnar sem liðið vinnur.

Þetta var hörku gaman. Við byrjuðum reyndar á að tapa fyrsta leiknum 4-0 en það var gegn liðinu sem endaði á að vinna mótið…. Keflavík Utd. Svo unnum við næstu 2 leiki… Unnum Geirfuglana 2-1 þar sem að Batti og Valur settu mörkin og svo unnum við baráttusigur á Huginn sem var nokkuð sterkt lið. Þar gerð Valur sér lítið fyrir og skoraði þrennu og þar af eitt með bumbunni. Þar með lentum við í 2 sæti í riðlinum og spiluðum um 3 sætið við Kóngana. Við lentum 2-0 undir eftir 3 mínútur og ekki var nú útlitið gott. En með gríðarlegri baráttu náðum við að setja 3 mörk og komast yfir. En því miður fyrir okkur jöfnuðu Kóngarnir þegar hálf mínúta var eftir af leiknum. Þá var gripið til vítaspyrnukeppni… 3 víti á lið. Kóngarnir skoruðu úr sinni fyrstu spyrnu. Svo steig undiritaður upp og skoraði úr okkar fyrstu spyrnu. Þar næst tók Dabbi Wium sig til og varði spyrnu Kóngana. Þá steig Karvel upp og dúndraði í slána… DOH. Kóngarnir skoruðu aftur úr víti og Valur jafnaði úr sinni spyrnu. Þá var það bráðabani. Kóngar skora…. Haukur jafnar, Kóngar skora, Halli jafnar, Dabbi ver spyrnu kóngana og Batti tryggir okkur bronsið. Sniiillld og mjög gaman.

Þið sem nenntuð að lesa þetta… sorry fyrir fótboltasöguna en það er ekki svo oft sem að liðið mitt vinnur til verðlauna þannig að ég er í hátíðarskapi í dag….. fyrir utan helvítis Man Utd að tapa fyrir LFC og enn einn miðjumaðurinn frá… En það er önnur saga.

Þangað til næst…..

Ég bara finn mig knúinn til að stela þessari grein af baggalúti:

Hvað er nú orðið um öskudaginn? Þennan skemmtilega dag þegar börn flykkjast í bæinn með heimasaumaða öskupoka og handbeygða títuprjóna og laumast til að næla þeim í grunlausa vegfarendur. Hver fjandinn varð um þennan dag? Hvar eru allir öskupokarnir? Hvar er spennan við að læðast á eftir kápuklæddri bomsuskæddri kellingu og hengja á hana öskupoka sem var haganlega saumaður með aðstoð frá mömmu eða ömmu?

Ég skal bara segja ykkur það: þetta er allt saman fokið út í veður og vind. Og hvað tók við? Botnlaus andskotans græðgi, sætindabetl og nammisníkjur. Svei því öllu! Og svei þessum viðurstyggilegu, demónísku morðingjabúningum sem verslunarmenn kaupa fyrir slikk á amerískum hrekkjavökuútsölum og pranga inn á saklaus börn ekki bara einu sinni, heldur tvisvar á ári, því auðvitað þarf líka að halda upp á hátíð andsetinna graskera.

Eru þetta gildin sem við viljum innræta börnunum okkar? Í alvöru? Að betla sælgæti úti á götu blóðug upp að öxlum. Vopnuð hnífum. Með hauskúpugrímur. Frekar en að leggja stund á hannyrðir heimafyrir í faðmi fjölskyldunnar og sprella dulítið í kápuklæddum bomsukellingum einu sinni á ári?

Greinilega. Asnar!

Ég er svo hjartanlega sammála þessu að það hálfa væri nóg.

Þangað til næst…..