Sunnudaginn 17. mars varð einhver sú fegursta norðurljósasprengja sem ég hef náð að festa á minniskubb. Þvílík sýning. Við Sumarliði skelltum okkur rúnt og fórum fyrir jökul. Sýningin var mest frá kl. 22:00 og til miðnættis en þá dró verulega úr virkninni.
Þessar tvær myndir voru teknar á meðan sýningin var sem mest. Báðar úr Kolgrafafirði.
Næst var ferðinni heitið að Kirkjufellsbrúnni. Þar stoppuðum við í smá stund og tókum nokkra ramma. Mikið af túristum þarna og á tímabili töldum við einhverja 10 aðra ljósmyndara þarna.
Eftir það héldum við lengra út á nesið. Við stoppuðum aðeins fyrir neðan Mýrar og mynduðum fjallið aftur, komum svo við hjá Skerðingsstöðum og tókum nokkrar myndir þar. Fórum yfir Fróðárheiði og komum við á Búðum. Þar voru ljósin aðeins farin að dofna en samt var svaka sýning í gangi.
Eftir Búðir héldum við áfram og stoppuðum við Lóndranga og á Svalþúfunni.
Eftir Lóndrangana var sýningin nánast búin og við rúntuðum heim á leið.
Þetta var rosa gaman og maður var ekki kominn upp í rúm fyrr en um hálf fjögur um nóttina. Maður var hálf myglaður morguninn eftir. En þetta var samt þess virði.
Einnig voru hér á dögunum tökulið frá BBC sem var að taka upp efni fyrir einhvern hvalaþátt. Þeir voru með þessa svakalegu græju sem gat svifið yfir hvölunum og myndað… frekar magnað dæmi. Verð að eignast svona.
Þangað til næst…