Sumarið kom og fór

Í dag er eitt ár síðan við Sumarliði vorum að þvælast uppi á hálendi Íslands að mynda eldgosið í Holuhrauni. Nánar má lesa um það hér.

Í sumar var mikið um að vera. Við Rúna fórum til Glasgow ásamt góðum hópi fólks úr Fjölbrautarskóla Snæfellinga. Þar var ýmislegt brallað eins og gönguferð um hálendið, skólar heimsóttir og smakkað á nokkrum öl.

Glasgow cathedral

The wall

Teasing pigeons

The hiker

Fljótlega eftir heimkomuna frá Glasgow þá skelltum við Rúna og Kristján Freyr okkur í The Color Run í Reykjavík. Það var alveg hrikalega gaman og Kristján lék á alls oddi.

Color Run from Tomas Kristjansson on Vimeo.

Svo var það Download festival í júní. Við Gústi, Ninni og Erling skruppum til Englands og komum okkur fyrir í smábænum Loughbrough. Tilefnið var hin stórkostlega rokkhátíð Download Festival. Þar rættist gamall draumur þegar ég sá Kiss stíga á stokk á lokakvöldinu. Annars var þetta frábær hátíð en hæst bar að nefna headline böndin Muse, Slipknot og Kiss en það voru fleiri stórkostleg bönd þarna eins og Clutch, The Darkness, Mötley Crue, At The Gates, Parkway Drive og svo mætti lengi telja. Þetta var ótrúlega gaman.

DL2015

DL2015

DL2015

Fljótlega eftir komuna frá Englandi tók hið hefðbundna íslenska sumar við sem var með ágætasta móti. Falleg sólsetur, Fótboltamót, ferðalög og þess háttar. Leyfi myndunum að tala sínu máli.

Red cloud

Enjoy the sunset

Golden hour

Hi there

Birkir
Kristján Freyr hitti Birki Bjarnason

meiddur
Við Kristján fórum á Orkumótið í Eyjum og annar okkar þurfti smá aðhlynningu

orkumotid
Orkumótið var samt rosalega skemmtilegt

kirkjufell
Við Rúna og Gústi fórum upp á Kirkjufell

skinandi
Kíkti á fossinn Skínanda

Skínandi

Í júlí fórum við svo austur í ferðalag. Fórum á Eistnaflug þar sem að Kvelertak stóð algerlega uppúr. Líklega eitt svalasta live band sem ég hef séð að öðrum ólöstuðum á þessari frábæru hátíð.

eistnaflug
Við Gústi að bíða eftir Kvelertak

rockon
Mæðgur gera rock on með misjöfnum árangri

Hér má svo sjá smá myndband sem ég sullaði saman eftir ferðalagið.

Ferðalag 2015 from Tomas Kristjansson on Vimeo.

Fórum líka í nafnaveislu hjá litlum prins.

ERS
Rúna fékk annan nafna

KMM
Svo kom önnur gullfalleg jobbalína í heiminn sem síðar fékk nafnið Kristín María

Svona er sumarið búið að vera og nú styttist í Tyrklandsför fjölskyldunnar en í tilefni 60 afmæli múttu gömlu var ákveðið að kíkja á sólarströnd. Nánar um það síðar.

Þangað til næst….

Advertisements

Vorið á næsta leiti

Jæja það er búið að vera ákveðin deyfð yfir þessari blessuðu síðu upp á síðkastið. Síðasti pistill var einhver áramótayfirferðarpistill frá því í byrjun janúar og nú er bara allt í einu kominn 16. apríl eins og ekkert sé sjálfsagðara. Ekki það að það hafi ekki nóg verið í gangi hérna í Grundarfirðinum en við skulum hlaupa yfir það helsta…

Þann 10. janúar fórum við fjölskyldan í bústað upp í Skorradal til að ná jóla og áramótastressinu úr okkur. Það var æðislega kósý enda einstaklega fallegur staður.

Í janúar varð ég svo þess heiðurs aðnjótandi að fá nokkrar myndir birtar í Daily mail frá eldgosinu í Holuhrauni. Að sjálfsögðu kom frétt um það í Skessuhorninu

Í febrúar tókum við verklegt slökkviliðspróf og fengum löggildingu sem slökkviliðsmenn eftir það.

Tommi

Og einnig var farið á 50 þorrablót hjónaklúbbsins.

tommiogruna

Svo fórum við í söfnun á Lucas 2 hjartahnoðtæki. Frétt af vef Skessuhorns.

lucas

Öskudagurinn var tekinn með trukki…

Mr. Simmons

ellen

Í mars var mikið myndað og enda mikið í gangi… Norðurljós og rok.

Grundarfjarðarhöfn

Frozen harbour

runa

Rúna mín var náttúrulega að massa það í blakinu þessi elska.

Svo kom náttúrulega kolvitlaust veður annað slagið en það versta var 14. mars.
The storm

Óveður í Grundarfirði 14. mars 2015 from Tomas Kristjansson on Vimeo.

Svo kom þessi brjálaða norðurljósasprengja þann 17. mars síðastaliðinn.

Aurora Borealis from Tomas Kristjansson on Vimeo.

Alveg magnað helvíti.

Svo var náttúrulega blessaði sólmyrkvinn.

Við Rúna og Kristján Freyr skelltum okkur á Harlem Globetrotters. Mikið fjör þar.

globetr

globetr2

Um páskana skruppum við svo norður. Skíðuðum á Akureyri í 2 daga og vorum í góðu yfirlæti hjá Svenna og Þórhildi. Fórum svo á Húsavík í eina nótt og svo 3 nætur í Bárðardalinn. Yndislegt alveg hreint.

hlidarfj

hlidarfj2

godafoss

aldey

Svo lét ég verða af því að fjárfesta í dróna enda með tækjalosta á háu stigi. Splæsti í Dji Phantom 2 vision+ kvikindi. Magnað tæki alveg hreint.

drone

Fyrsta flugið from Tomas Kristjansson on Vimeo.

Flug yfir smábátahöfninni from Tomas Kristjansson on Vimeo.

Svo skruppum við til Reykjavíkur um daginn og kíktum meðal annars á litla frænda minn sem er æðislega fallegur.

gustavsson

Ætli maður láti þetta ekki duga í bili enda vafalaust langt í næsta blogg…

Þangað til næst…

Ferðalagið á vimeo

Ég hef verið að dunda mér aðeins að klippa saman efnið úr ferðalaginu og það er bara ansi skemmtilegt verkefni. Vonandi er líka skemmtilegt að horfa á það fyrir ykkur hin eins og það er fyrir mig. Væntanlega öðruvísi stemming. En megin hugmyndin er að búa til minningar fyrst og fremst. Enda minnið í gamla orðið ansi gloppótt.

Ferðalag 2014 part 1 from Tomas Kristjansson on Vimeo.

Þetta var semsagt fyrsti hlutinn þar sem að Sólheimasandur er í aðalhlutverki.

Ferðalag 2014 part 2 from Tomas Kristjansson on Vimeo.

Annar hlutinn er frá sama degi og myndbandið á undan en nú er það rúnturinn úr Þakgili sem er afskaplega fagurt.

Ferðalag 2014 part 3 from Tomas Kristjansson on Vimeo.

Svo er það þriðji hlutinn þegar við vorum að þvælast í Dverghömrum, Svínafellsjökli, Jökulsárlóni, Egilsstöðum, Eistnaflugi svo eitthvað sé nefnt.

Svo eru fleiri myndbönd væntanleg. Fer eftir tíma og nennu en það er af nægu að taka. Gopro er algjör snilld bara svo að það komi fram.

Þangað til næst…

Ferðalagið 2014

Þar sem sumarið 2013 var nýtt til barneigna en ekki ferðalaga var ákveðið að halda í ferðalag um Ísland þetta sumarið. Lagt var af stað þann 7. júlí síðastliðinn fyrir hádegi og haldið suður á bóginn.

Ferðalagið

Mánudagur 7. júlí.

Við lögðum af stað í ferðalagið mikla fyrir hádegi og fyrsta stopp var að sjálfsögðu í bakaríinu í Borgarnesi. Svo var stoppað í Reykjavík og komið við í Ellingsen og Smáralind. Hittum Ellen og Svein og héldum svo ferðinni áfram á Suðurlandið. Tókum stutt nestisstopp í grænum lundi einhversstaðar á Suðuarlandsundirlendinu og viðruðum Ellen. Svo var komið í Garðakot um kl. 21:00 þar sem að Eva frænka og fjölskylda tók á móti okkur með uppábúið rúm. Alltaf jafn yndislegt að koma þangað.

Þriðjudagur 8. júlí.

Vöknuðum í Garðakoti og fengum dýrindis lummur. Yngsti fjölskyldumeðlimurinn var einstaklega sáttur með það. Fórum á rúntinn með Auðun Adam og skoðuðum flugvélaflakið á Sólheimasandi, Fórum upp á Reynisfjall og fórum svo í Þakgil. Mynduðum og lékum okkur, borðuðum nesti í guðsgrænni náttúrunni. Svo biðu okkar dýrindis fiskibollur þegar við komum aftur í Garðakot.

Final resting place
Flugvélaflakið á Sólheimasandi

Reynisdrangar
Reynisdrangar séð af Reynisfjalli

Múlakvísl
Múlakvísl

Þakgil

Miðvikudagur 9. júlí.

Við vöknuðum í Garðakoti og kvöddum fólkið eftir frábæra daga. Komum við á Vatnskarðshólum og knúsuðum Möggu frænku líka. Tókum birgðastopp á Kirkjubæjarklaustri. Nestisstopp á Dverghömrum. Veður var ágætt þegar við rúntuðum áleiðis austur á bóginn. Við tókum stopp við Kvíárjökul, Fjallsárlón og Jökulsárlón þar sem að við fórum í siglingu um lónið. Stoppuðum á Höfn þar sem að við hittum Ninna, Dagmar og Nóa þar sem við fórum í sund og fengum okkur svo að borða. Keyrðum svo á móti fallegu sólsetri lengra austur um Öxi og svo niður á Hérað. Vorum komin á Egilsstaði um miðnættið og við tók 3 daga rokkveisla.

Father and son
Kvíárjökull

Fjallsárlón
Fjallsárlón

The boatride
Sigling á Jökulsárlóni

Holding the ice
Kristján Freyr

Hliðið
Hlið aldarinnar

Fimmtudagur 10. júlí.

Vöknuðum á Egilsstöðum, fórum á róló og svo fórum við Ninni á Norðfjörð á Eistnaflug þar sem við rokkuðum flösuna úr hárinu (skallanum) með Sign, At The Gates og fleirum. Hitt liðið var í almennu chilli á Egilsstöðum.

Egils
Róló á Egilsstöðum

Eistnaflug
Í 20 stiga hita á Neskaupsstað

Föstudagur 11. júlí.

Vaknað á Egilsstöðum og farið á Eistnaflug. Skálmöld, Sólstafir og Dimma stóðu uppúr það kvöld. Mega gaman þó að það hafi rignt enda allir tónleikarnir inni.

Rokk

Laugardagur 12. júlí.

Vaknað á Egilsstöðum og farið á síðasta Eistnaflugsdaginn. Ham, Maus, Havok og Jónas Sig stóðu fyrir sínu þetta síðasta Eistnaflugskvöld. Undirritaður var orðinn frekar lúinn undir það síðasta enda langt síðan maður hefur tekið svona á því. En Eistnaflugshátíðin var samt frábær í alla staði og vel þess virði að bregða sér austur.

kaffi

Baldur
Þessi hátíð var frábær

Sunnudagur 13. júlí.

Vöknuðum á Egilsstöðum og tókum túristann á þetta. Rúntuðum á Skriðuklaustur og skoðuðum í gestastofu Landsvirkjunar. Fórum upp að Kárahnjúkavirkjum, kíktum í hin hrikalegu Hafrahvammsgljúfur og svo fóru Rúna og Kristján í bað á Laugavöllum. Rigndi þó nokkuð þann daginn. Svo var farið niður í Jökuldal þar sem að Solla og Stefán buðu okkur í steik með öllu tilheyrandi. Yndislegt að sækja þá höfðingja heim.

Tourist
Mikið fjör

Mánudagur 14. júlí.

Kvöddum Ninna, Dagmar og Nóa og keyrðum til Vopnafjarðar þar sem að Svanborg og Ellert biðu með vöfflur og kaffi. Frábært að stoppa þar og allir í glimrandi góðum gír. Héldum svo áfram yfir Vopnafjarðarheiðina og í átt að Norðurlandinu. Fórum svo Engidalinn og enduðum ofan í Bárðardal þar sem að Anna, Jobbi, afi Addi, amma Gunna, Sigrún og Lauga biðu eftir okkur með steikt læri á borðum. Planið var að taka nokkra daga í Klapparhúsi.

Top of the world
Rúna pósar á Hellisheiðinni

Ellen
Prinsessan var kát í Klapparhúsi

Þriðjudagur 15. júlí.

Slökuðum á í Klapparhúsi framan af degi. Fórum á fjórhjólið og í pottinn. Tókum myndarúnt að Hrafnabjargarfossi. Seinnipartinn var svo rúntað að Réttartorfu til gistingar. Göngugarpar hituðu upp fyrir göngu morgundagsins með því að ganga frá Stóru Tungu áleiðis að Hrafnabjargarvaði. Í Réttartorfu var svo steikt lambafillet ofan í mannskapinn en daginn eftir hugðust kjarkmiklir göngugarpar ganga frá Réttartorfu að Stóru flesju. Mikið vatn var í Sandá sem er við Réttartorfu og því var ekki lagt með Kiuna yfir ána og því var hún skilin eftir norðanmegin við ána. Öllum troðið í Pajeroinn hennar Sigrúnar og liðið ferjað á einum bíl yfir.

Sandá
Sandá

Miðvikudagur 16. júlí

Ellen Alexandra Tómasdóttir varð 1 árs og var því fagnað með staðgóðum hafragraut í Réttartorfu. Göngugarparnir (Rúna, Kristján Freyr, Anna, Lauga og Sigrún) héldu af stað í sinn langa göngutúr. Jobbi fór og renndi fyrir fisk í Krossá en afmælisbarnið og undirritaður rúntuðu til baka í Klapparhús. Seinnipartinn var svo farið á rúntinn og göngugarparnir sóttir á Stóru Flesju við Suðurá eftir 6-7 klst göngu. Þar var tekið á móti þeim með kaffiveislu. Um kvöldið fór ég svo í smá ljósmyndarúnt að Aldeyjar og Ingvarafossum. Gist í Klapparhúsi.

myndir

Aldeyjarfoss
Aldeyjarfoss

Suðurá
Suðurá

Fimmtudagur 17. júlí.

Við vöknuðum í Klapparhúsi og snæddum hádegisverð. Svo var haldið í svaðilför á Kíunni. Rúntaður Engidalur að Mývatni, Þaðan eftir þjóðvegi 1 austur og beygt út af honum áleiðis að Herðubreið. Þar fór Kian í tvöfaldan undirvagnsþvott í Graflandsá og Lindá en hafði það af. Stoppað í Herðubreiðarlindum í göngutúr og nesti. Rúntað upp í Öskju og komið þangað um kvöldmatarleytið. Tilgangur þeirrar ferðar var sökum mikillar löngunar hluta hópsins til að baða sig í öllum helstu drullupollum landsins og nú var það Víti sem átti að njóta nærveru þeirra. 2,4 km ganga frá bílastæði að Víti og Öskjuvatni. Við létum okkur hafa það að ganga þessa leið í blautum og þungum snjó og reyndi það verulega á alla í hópnum. Svo var komið að Víti bara til þess eins að sjá að ekki var hægt að baða sig í pollinum sökum gríðarlegs snjóskafls sem var ofan á göngustígnum. Semsagt ófært og niðurlútir baðsjúklingar héldu í hina erfiðu göngu að bílastæðinu aftur. Komið til baka í bílinn kl 20:30 og allir svangir og þreyttir. Stoppað örstutt í Dreka og haldið heim á leið. Sólsetrið á fjöllum er yndislegt og við komum í Klapparhús kl 01:00 eftir miðnætti örþreytt en sátt og sæl. Svo nokkrum dögum síðar hrundi hálf hlíðin í Öskjuvatni og myndaði svaðalega flóðbylgju. Ég hefði ekki viljað vera þarna þegar að það gerðist.

askja
Gengið að Öskju og Víti

Herdubreid
Í Herðubreiðalindum

Föstudagur 18. júlí.

Vöknuðum í Klapparhúsi og pökkuðum niður. Frábært veður og 18 stiga hiti. Ætluðum í sund á Laugum en urðum frá að hverfa vegna hálku… reyndar var hálkan í klefunum og því fór sem fór. Fórum í staðinn á Stóru Tjarnir og hittum Jón Eggert og Fanney Dóru. Einnig voru Tinna, Kalli og Líney þar í ferðalagi þannig að úr varð allsherjar skemmtun. Borðuðum frábæran mat og áttum góða stund. Fórum svo til gistingar á Lundarbrekku þó svo að húsráðendur hafi ekki verið heima.

hitinn
18 stig í Bárðardalnum

liney
Líney, Ellen og Kristján á Stóru Tjörnum

Laugardagur 19. júlí.

Vöknuðum á Lundarbrekku og pökkuðum niður. Héldum áleiðis til Akureyrar þar sem að við hittum Þórhildi og litla sveininn hennar… Stóri Sveinn var vant við látinn. Þórhildur græjaði hádegismat fyrir liðið og svo fórum við með þeim Þórhildi, Brynhildi, Laugu, Þorgerði, Láru og Óla á miðaldahátíð að Gásum. Mikil rigning þann daginn. Fórum á kaffihús með þeim eftir miðaldahátíðina. Svo var farið á Greifann og lagt í hann heim á leið. Komum í Grundarfjörðinn eftir miðnætti eftir 12 daga frábært ferðalag.

KFT
Kristján Freyr í miðaldahátíð

Grundarfjörður
Grundarfjörður

Þangað til næst….